Bo Promesa Mi Orashon

Bo ke bendishon? Bo tin miedu? Bo ke siña para fuerte? Bo ke sinti bo sigur? Bo ta deseá un bida abundante? Bo ke tin goso? E buki akí lo guia bo na e kontesta riba kada pregunta. Bo ta haña un splikashon na un forma kla kiko Dios ta bisa di e temanan akí i kon pa apliká nan na bo bida diario. Meta di e buki ta pa yuda bo hasi orashon i para riba algun di Dios Su promesanan den diferente situashon, ku konstantemente bo ta haña bo mes konfrontá kuné. Orashon ta nifiká papia ku Dios. I kon bo ta hasi esaki? PidiÉ yudansa, pero tambe bisÉ kon gradesido bo ta n'E. E buki akí lo duna bo diferente promesa i forma kon pa usa kada un di nan. Asina bo por hasi orashon ku mas konfiansa i spera un kontesta di Dios pa kada un di bo petishonnan. Komo resultado lo bo tin e forsa pa enfrentá bida i tur su retonan. Kisas bo ta puntra bo mes: "Dios a primintí mi algu? I ki ora mi por sa si loke El a primintí den Beibel ta konta pa ami tambe?" E palabra Beibel ta bini di e palabra griego "biblia", ku tradusí ta nifiká "buki". Pasobra Beibel ta konsistí di vários buki i huntu nan ta forma e Beibel. Den e bukinan bo ta haña diferente orashon, lei, kantika, historia i palabra sabí. Den Beibel tin dos tipo di promesa: promesa general i promesa spesífiko. E diferensia ta ku promesa general ta konta pa tur yu di Dios. Den kapítulo 8 di e buki akí, bo ta haña mas splikashon tokante e tema "yu di Dios". Un ehèmpel di un promesa general bo ta haña den 2 Timoteo kapítulo 1, versíkulo 7: "Pasobra Dios no a duna nos un Spirítu di temor, sino di poder i di amor i di sano huisio." Esaki ta un promesa di Dios ku si bo pidiÉ ku konfiansa, E lo sòru di kita bo miedu i kambia esaki den forsa, amor i dominio propio.

Pagina's: 174, Paperback, Saved to Serve International Ministry