HAZARON RANG

"Hazaron Rang" keval kavitaon ka sankalan nahin, apitu jeevan ke vividh anubhavon ki ek bhav-yatra hai. Is sangrah mein anekon rang hain. Yahan prem ka rang hai to mamta ka rang bhi hai, sangharsh ka rang hai to shram ka rang bhi hai, deshbhakti ka rang hai, prakriti ka rang hai to peeda ka bhi apna ek gahra rang bhi hai. Kahin aasha ki kiran hai to kahin vyavastha ke andhere se sangharsh karta hua aakrosh bhi hai.Sangrah ki anek rachnayein samajik prashnon se seedhe samvad karti nazar aati hain. Gareebi, bhrashtachar, swarth, berozgari, sampradayikta, dikhawa aur naitik moolyon ke ksharan ko lekar kavi ke bheetar jo bechaini hai, vah anek kavitaon mein mukhar hui hai. Prastut kavya-sangrah mein kavi keval vyavastha par prashn nahin uthata, balki vyakti ko bhi aatmalokan ke liye prerit karta hai."Hazaron Rang" aapke haathon mein hai. Padhiye, mehsoos kijiye aur jahan man kahe, wahan in shabdon ko apne anubhavon se poora kijiye.