Kasi Wogwarazve Kahi?

Kasi Wogwarazve Kahi? mubatanidzwa wenhetembo dzakanyogwa naTanaka Chidora munguva inokwana kuita makore manomwe. Nhetembo idzi dzinobata zvunhu zvakawanda: vupenyu bhwemuridzi wehwi riri kudetemba, nyika yemunhu ari kudetemba, shamwari dzakwe, vana vakwe, kare kwake, ndangariro dzakwe, vadiwa vakwe, hama dzakwe, kufara kwake, kuremegwa kwake, mazheti akwe nezvimwevo zvakawanda zvinoita kuti vupenyu bhwuve vupenyu sekuziva kwatinobhwuita. Mukudetemba uku, Chidora ari kutiratidza kuti zvinotora kakugwara kuti ugone kuita mazuva maviri uchitsanangura mamiriro enareti yawakanonga pachikumbaridzo chemukova wako zuro mangwanani. Nerimwe shoko tiri kuti, pane zvimwe zvunhu zvinoita sezvisina basa asi tozovona vudzamu bhwazvo nekuda kwekuti pane mudetembi abvuma kuderera chaizvo kusvika pazera rezvunhu izvozvo, kwava kutarisa mumboni yezvunhu izvozvo, kwava kuchizoti kumuverengi, "Dovuya vuno ndikuratidze zvandavona." Nhetembo idzi dzakanyogwa nemutauro wechiKaranga unokufungisa ihwi remunhu ari kuinda kuchigayo achimhorosana nemukare ari kumema munda mumazuva aya ekuti mvura inenge ichiita seyakatuta twayo ikarova pasi.